Hues: 6 aña prizon pa hóben ku no por a dominá su rabia
Willemstad – Rabia ta kos di dominá, asina hues a duna di konosé durante su veredikto. Hues a motivá su veredikto i a bisa ku e ta komprondé ku e akusado tabata hopi rabia i agitá, pa motibu ku a ranka su kadena for di su kurpa. Pero tabatin sufisiente tempu pa e rabia aki baha, pero e akusado a agredí su agresor i sigui persiguié i final los un tiru ku arma di kandela riba dje. Afortunadamente e víktima agresor no a haña heridá ku a kousa su morto. Esaki a pone ku hues a imponé un kastigu di 6 aña di prizon riba e akusado Humberto Michel (21) bou di preteksto ku su rabia a dura muchu largu i e tabatin hopi tempu pa el a hala atras i legumai e konfrontashon.
Kondena di 6 aña prizon korte a imponé riba e akusado Humberto ku a maltratá su kontrinkante, te na ora e kontrinkante a haña chèns di kore, Humberto a kre su tras. E kontrinkante a subi su skuter pa e hui, Humberto ta drenta outo su tras i trata di trap’é i finalmente basha bala riba dje ku resultado di un herido na su brasa. E echo ku e víktima a haña bala na su brasa no ta danki na Humberto, pero ta suerte ku e no ta pará dilanti hues pa asesinato. El a tira determiná i p’esei hues a haña intento di asesinato premeditá proba.
Hues a pone hopi énfasis riba e seriedat di e suseso i a bisa ku Humberto tabata hopi rabia pa motibu ku e su agresor a ranka su kadena for di dje, pero su rabia a dura muchu largu. Tabatin hopi tempu ku Humberto por a legumai e asuntu aki i kana bai.
Despues ku e víktima a ranka kadena, Humberto a kue su arma di kandela i maltratá e víktima ku esaki malamente. Ora ku e agresor a logra skapa for di gara di Humberto i subi su skuter bai, Humberto no a legumai, pero a drenta su outo i a bai tras di e agresor. El a trata di trapa e agresor ku su outo, pero e no ta logra i e ora ei el a kuminsá basha bala riba su agresor i un bala a alkanse na su brasa.
Hues ta di opinion ku meskos ku bala a alkansá e agresor na su brasa, e por a alkansá e víktima di tal manera ku e por a bèrdè su bida tambe.
Esaki ta motibu ku hues ta haña ku intento di asesinato premditá ta probá i a yega na un kondena. E demanda di fiskal tabata 8 aña di prizon i hues ta yega na un kondena di 6 aña pa motibu ku e víktima ta esun ku a kuminsá ku e problema.
E akusado tin dos siman pa e apelá e veredikto.
###
Polisial èkstra ordinario ta lòs tiru i pone ku ladron ta entregá
Willemstad – Un (polis ekstra ordinario) bewaker atento a tuma nota di un persona ku tabata kana den un forma sospechoso ku algun kos den su man. Ora ku e persona a tuma nota ku e bewaker o sea agente polisial èkstra ordinario tabatin bista riba dje, el a kuminsá kore. Esaki a pone ku e agente polisial èkstra ordinario a lòs un tiru i a pone ku e ladron a para. Akinan a bin haña e hòmber aki ku vários bòter di bebida. Pues e no a haña chèns pa e bebe nada di e loke ku el a hòrta.
E hòmber Tairon V. (35) a atmití su kulpabilidat ku el a hòrta den un restorant. Esaki a pone ku fiskal a pidi un kastigu di 6 luna kondishonal i un periodo di prueba di 3 aña i apesar ku no tin un rapòrt di reclassering fiskal ta pidi pa tòg hues imponé guia di reclassering.
Abogado pa manda e akusado Brasami, pa por sak’é for di e sirkuito di droga.
Hues a haña e echo probá, pero e no tin niun informashon di e akusado i di otro banda e ta haña e demanda suave, pero tòg aseptabel, pa motibu ku e akusado no tin karchi di kastigu (first offender) i a bai di akuerdo ku e demanda di fiskal.
###
Tres piskadó ta haña djùk ku 40 kilo di kokaina aden
Willemstad – Tres piskadó a trata di splika hues ku durante ku nan tabata piska, nan a haña dos djùk ta drif riba laman. Ora ku nan a kue e djùknan, nan a mira paki pretu den e djùk, pero no sa kiko nan tabata. E djùknan tabata pisá, pero no por a pensa ku ta droga. Esaki ta djùknan ku tin e boka ku ta sera ku tapa di skruf. Segun fiskal e piskadónan no tabatin ‘as’ pa piska ni tampoko djùk pa pone piska aden si nan logra piska. Fiskal no a kere nan historia i a pidi hues pa kondená kada un di e piskadónan ku nan edat ta varia di 26 aña pa 63 aña na 5 aña prizon kada un.
Korte a trata kaso di importashon di 47.680 gram (47 kilo 680 gram) kokaina ku Warda Kosta a interseptá riba laman ora ku e boto Maria tabata nabegá na Kosta di Kòrsou. E boto aki a keda señalá komo sospechoso, pa motibu ku riba radar di Warda Kosta a nota kontakto ku un otro boto. Esaki ta akshonnan kustumbrá ora ku ta trata di importashon di kokaina i esei ta motibu ku a manda un boto “superrib” pa wak kiko ta pasando. Na nan yegada a listra e boto i a haña dos “jerrycan” ku primeramente ta destiná pa líkido so, ku paki di koka aden.
Esaki ta motibu ku Ministerio Públiko a akusá e akusadonan Raul Wellman (26), Jonathan Damascus (26) i John Damascus (63) di importashon di algu mas ku 47 kiko di kokaina aki na Kòrsou. Banda di esei tin un akusashon mas di poseshon di arma di kandela mas munishon ku polis a haña durante un entrada hudisial na Kaya Balaster. E suseso aki a tuma lugá dia 12 di febrüari.
Den e prosèsverbal di Warda Kosta nan a duna di konosé ku ora ku nan tabata yegando, nan a mira kon Jonathan a tira linia na awa i hasi manera ta piska e ta piska. E personal di Warda Kosta a listra e boto i a bin haña dos djùk ku kokaina aden.
John ku ta kapitan di e boto a duna di konosé ku ora ku nan tabata piska nan a mira e djùk nan ta drif riba awa i nan a kue nan. El a mira ku Raul a habri e tapa i a bisa ku e ta mira algu pretu den e djùk. Pero na polis el a deklará otro. Einan John lo a deklará ku ora ku nan a kue e djùk, Raul a habri e tapa i a bisa ku tin kos bon den e djùk nan. Pero segun John, esei e no a bisa, ta polis a bisa e kos ei. Na hues Komisario el a bisa ku ora ku Raul a wak den e djùk, el a kanta bingo ora ku el a habri tapa di un di e djùk nan. El a agregá ku ta trata di kos bon. Ayera nan ta nenga e tipo di ekspreshonnan hasí.
E otro akusado a Raul a deklará ku ta riba laman nan a topa e djùknan aki ta drif i nan a kue nan i nan a ripará ku e djùknan ta pisa ora ku nan a hisa nan den boto i a tuma nota ku den e djùknan tabatin kos pretu.
E otro akusado Jonathan a splika ku e tabata malu, e tabata drumi so. E ta bisa ku el a lanta dor di motor di e boto di Warda Kosta i gritamentu di agentenan di Warda Kosta.
Despues di e interpretashon di e kokaina riba laman, polis a bai na kas di e piskadó nan i einan a haña un “alarmpistol”.
Fiskal den su rekisitorio a splika kon a yega na e droga aki i a splika ku Warda Kosta su radar a wak e boto i nan a manda un ‘superrib’ pa listra e boto. Durante listramentu nan ta haña droga tambe. Ta trata di un sirio ku ta konosí ku kontaktonan pa pasa droga a tuma lugá. Den e kaso di Maria, el a hasi uso di e ruta aki na vários okashon, pero no ku fiskal ta bisa ku ta droga nan a transportá e dianan enkuestion, pero ta remarkabel.
Fiskal ta haña e deklarashonnan di e akusadonan simplemente mentira fragante, nada no ta kuadra ku realidat i a pidi un kastigu di 5 aña prizon pa kada un. Veredikto ta 17 di yüni benidero.
###
Mayornan kara kara ku asesino di nan yunan Attaf i Randt
Willemstad – Por a sinti e tenshon i rabia ora ku asesinonan di Nikita Attaf i Shendrick Randt a drenta den sala di korte djarason 27 di mei. E akusado mayó ku por sierto ta esun ku a koperá ku hustisia i yuda solushoná e krímen pisa aki, mester a sinta riba un distansha ku e sobra otro 4 akusadonan ku tur ta kolombiano. Tin menasa hopi serio den direkshon e akusado mayó Nahum Heeren (25). E kuater otro akusadonan ta Jhoan Franco (28), Bledisson Garcia (23), Fabian Franco (21) i Rudolf Franco (23). E último kuater akusadonan aki tur ta kolombiano. Tin no ménos ku 7 akusashonnan ta varia tres pa shete akusashon pa e akusadonan, pa motibu ku no ta tur ta metí den tur e kasonan ku lo keda presentá den korte penal.
Tur e sinku akusadonan aki ta keda akusá di atrako dia 8 di febrüari na Schonegevelstraat, kaminda ku a bai ku hopi kos di balor, nan ta keda akusá di a bende tur e kosnan ku nan a hòrta ku ta kai bou di e akusashon labamentu di e loke ku nan a hòrta. Tur ta keda akusá di poseshon di arma di kandela tambe.
E akusadonan Nahum, Bledisson i Jhoan tin tambe dos atrako mas di kua un di nan dia 27 di yüli 2014 na un kas na San Sebastian i tambe atrako riba riba Nikta Attaf i Shendrick Randt.
E dos akusadonan Nahum i Jhoan ta keda akusá di e likidashon di e Attaf i Randt.
Fiskal a pidi pa suspendé e kaso pa motibu ku ainda tin mester di resultado di DNA di un arma ku a keda usá i tambe rapòrt di reclassering. Ayera abogadonan a pidi tambe rapòrt sikólogo i hues a bai di akuerdo ku esaki.
Esakinan ta e dokumentunan ku ainda mester pa trata e kaso i a stipulá e fecha 19 i 21 di ougùstùs benidero pa trata e kaso.
###
8 aña prizon kologá riba kabes di Naigel pa granat ku el a tira
Willemstad- Bou di menasa di Valentina alias Pin, Naigel a Obispu (25) a trai granat riba kas di kontrinkante di Pin. Fiskal despues di un rekisitorio ampliamente motivá a yega na un demanda di 8 aña di prizon pa e akusado Naigel
Naigel ta keda akusá ku el a tira un granat na un kas den Kaya Yeye riba Ser’i Mahuma. Naigel a bisa ku el a tira e opheto eksplosivo riba petishon di Valentina alias Pin, kende ta sintando 20 aña i 9 luna di prizon.
Valentina na vários okashon a atentá kontra di e kas na Kaya Yeye, kaminda su enemigu ta biba. Pasobra “pa falta” di e enemigu aki el a mata Gecho riba Rooseveltweg, miéntras e ta tras di trali pa 20 aña for di 2013, e enemigu si a haña libertat den korte. Valentina a yega di sekuestrá ruman muhé di e enemigu aki na Kaya Yeye i vários biaha a pasa basha bala riba e kas, keriendo ku su enemigu lo ta den e kas.
Naigel a bisa ku Valentina a pone preshon riba dje pa bai tira handgranaat dia 15 òktober 2014. Valentina ta sa ku tabatin handgranaat i ku esaki pa tira riba prison i saka Valentina.
Naigel a bisa ku el a keda yamá dor di Valentina alias Pin ku a pidié pa hasi un trabou i p’esei e lo a duna e akusado 5000 florin. Pero segun e akusado e tabatin debe serka Valentina i mester a hasi algu pa Valentina. Pasobra na 2012 tata di Valentina a traha un deklarashon ku e akusado ta traha p’e tata di Valentina, pero no ta bèrdat.
Dia 15 òktober 2014 Valentina a yam’é i bisé ku e tin un handgranaat i pa tir’é riba e kas na Kaya Yeye. Shurendi Sambo a dun’é e handgranaat. Nan a bai e kas na Kaya Yeye, i a pone e “bòm” gewon riba stupi i no a tir’é.
Despues Valentina a yam’é puntr’é kiko a pasa i el a bisa Valentina ku e no ta hende dje kosnan ei. Valentina a bis’é si e no tir’é na Kaya Yeye, lo tir’é na su kas. P’esei Naigel a bai i tira e granat.
Polisnan a deklará ku durante interogashon e akusado a kuminsá yora, i a bisa ku e ta lamentá loke a pasa.
Tambe e akusado a deklará ku Pin a ofresé outo nobo i 16000 florin si e aseptá kulpa di e akusado ku tabatin e handgranaat nan den su poder.
Ayera Naigel a tende un demanda di 8 aña den su kontra. Aki tres siman tin veredikto.
