Detenshon
WILLEMSTAD, Curacao –– Djaweps dia 14 di mei den oranan di mardugá e tim di mantenshon di òrdu di Otrabanda reforsá ku unidatnan di diferente warda, a detené 4 sospechoso den Cher Asil en konekshon ku diferente aktividat kriminal. Durante kòntròl den e bario, e unidatnan a bin topa un hòmber ku un píldora di XTC. Un otro hòmber den besindario a opstakulisá e agentenan den nan trabou, pa kua motibu e tambe a keda detené. Den un kas den e bario aki, polis a konfiská un kantidat di mariwana, kokaina i píldora di XTC. Un wasmashin práktikamente nobo, prosedente di un ladronisia algun dia pasá tambe a keda hibá warda huntu ku dos sospechoso ku a topa den e kas en kestion. A presentá e kuarteto dilanti di un fiskal ouksiliar ku a ordená nan enkarselamentu, pendiente di mas investigashon.
###
Skuternan konfiská.
WILLEMSTAD, Curacao — Djarason 13 di mei alrededor di 10’or di mainta, e tim di mantenshon di òrdu di Rio Canario a topa dos skuter patras di un kònteiner, riba tereno di un edifisio pegá ku warda di reshèrshi na Kaya “Jo” Pinedoe. For di investigashon a sali na kla ku ta trata aki di dos skuter ku e sospechosonan ku a keda detené djadumingu último riba tereno di warda di polis na Rio Canario, a pone kla pa nan bai kuné. A konfiská e skuternan pa mas investigashon.
