Hòmber ku tabata usa menor pa ataká kondená na 8 aña prison
Willemstad – Dean Engelhardt a keda kondena komo lider di dos menor ku e tabata kometé atrako ku nan. Wes a baha e kastigu basta pa Dean debí ku e no a tira ku e armanan i tampoko tabatin violensia físiko. EL a kometé atrako riba tres toko chines,ladronisia di dos lampi for di un kas den Zuurzak, inkubrimentu di outo i poseshon di shotgun ku el a kometé e atrakonan kuné. Dean a usa dos menor di edat, un hobensita di 15 aña i un hobensitu di 14 aña. E hobensita di 15 aña na dos okashon a fungi komo shofùr di e vehíkulo. Hasta den e último kaso di atrako dia 3 febrüari 2015 na Toko Stakamahachi, e damita tabata bou di stür ta pita e atrakadónan pa hasi lihé. Apénas Dean a kaba di sali for di prison novèmber 2014 atrobe e ta kai sera. Di 14 aña ku fiskal a demandá kontra di Dean, el a keda sentensia na 8 aña di prison. Pa e dos menornan di edat kada unu wes a kondena na 12 luna di kual 6 luna kondishonal di detenshon hubenil i periodo prueba di 2 aña. Nan tin di sigui guia di Reclasering.
###
Hóben ta pretendé ku e no mester yudansa
Willemstad – E hóben Timothy M. Ayera a bisa wes ku enbèrdat e no mester di guia den su bida, debí ku el a siña su lès i lo no hasi nada malu atrobe. Timothy ta keda akusá ku dia 13 febrüari 2015 el a intentá na kita telefon for di un dama. E echo a tuma lugá den área di Punda. E dama a bisa ku e tabata kana i diripiente e akusado a bula para su dilanti. E akusado a ranka e telefon ku tabata den man dje dama víktima. E dama a reakshoná mesora i a ranka e telefon bèk. Seguidamente e akusado ta dal e dama un moketa den su pechu pone bai kai. E akusado ku tabata kana ku algun amigu, a konta nan kiko el a hasi. Timothy ta nenga di a ranka e telefon i a dal e dama. Timothy un dado momentu a stròp di bai skol i no ta tende di su mama. Por mira ku problema familiar entre mayornan tin su influensia riba e yunan den e kaso aki e akusado. Fiskal a pidi korte pa sentensiá Timothy na 12 luna kondishonal di detenshon hubenil. Awor aki e akusadó ta den Brasami.
###
Dos hóben den korte pa menasa ku arma di kandela
Willemstad – E dos hóbennan Jursly K. i Elviron L. tabata den sala di korte akusá di a menasa un señora ku arma di kandela i poseshon arma di kandela dia 13 yanüari 2015. Pa Jursly tin dos akusashon mas ku el a resistí su aresto dor di polis i menasa un agente di lo mat’é ora e sali for di prison. Tur kos a kuminsá ora ku nan a dal den outo di un konosí di nan. A surgi un interkambio di palabra ku frei di e señora. Despues ora nan a topa otro riba kaminda, e señora ku Jursly a start un diskushon di menasa kontra di otro. Despues Elviron a bai na kas di su amiga, kaminda polisnan a detené nan.
Na kas di Jursly a topa e arma. Elviron a bisa ku e arma ta di dje. Elviron na momentu di a kometé e echo aki tabatin 17 aña. Pero for di su 15 aña el a stòp di bai skol i no por a bisa ta dikon. E no ta tende di su mama i ta bai su mes kaminda. E no ke aseptá yudansa di reclassering. Pero reclassering ta haña ta importante pe ta den un kas di guia pe haña e guia nesesario si no e lo bolbe presentá na korte.
Jursly ta lamentá ku el a kai será, dor e ta bèrdè su futbòl ku e gusta hunga. E si a pidi korte yudansa. E akusadonan ta hóben, pero fiskal a tuma nan hopi na malu. Pasombra tabatin kampana pa entrega arma nan no a hasi esaki. A keda kuné i menasá hende. Teniendo kuenta ku Elviron ta menor di edat, fiskal a pidi 24 luna kondishonal i pa pone den un sentro di guia pa 1 aña pe haña guia pa bai skol, FMA, i tratamentu di sikólogo. Tambe 40 ora di treinen riba regulashon di violensia. Pa Jursly ku si ta será, fiskal a demandá 24 luna di kual 6 luna kondishonal ku guia di Reclassering. Wes Carmelia no a dikta sentensia mesora pero ta tuma su tempu pa studia e kaso i pa dikta sentensia aki tres siman.
Fuente Hustisia.com
