Atrako na un kas den Jongbloed.
Djaweps 4 di yüni 2015, alrededor di 05.42’or Sentral di polis a dirigí un unidat polisial na un kas na Jongbloed pa un kaso di atrako. For di un investigashon ku polis a realisá a resultá ku e habitantenan di e kas a keda sorprendé pa dos (2) hende hòmber kara tapá i ku arma di kandela den man ku a drenta den e kas. E sospechosonan a mara un señora di edat (79 aña) riba kama i buta un otro dama (37 aña) na rudia i bou di menasa a kita tur nan prendanan for di nan, listra den e kas i bai ku un suma di plaka i tambe e grabadó di kámara di seguridat. Personal di Slachtofferhulp ku a presentá na e kas a duna e víktimanan asistensia. E investigashon ta kontinuá.
###
Kontròl di tráfiko.
Djarason 3 di yüni 2015 H.I.T. tim a tene un kontròl di tráfiko dirigí riba pasamentu den lus kòrá, entre 14.00’or pa 15.00’or riba Sta. Rosaweg/Seru Loraweg. A parti un total di 12 prosèsverbal na shofùrnan ku tabata pasa den lus kòrá i a parti dos prosèsverbal pa kore outo sin un reibeweis.
###
Atrako den Kaya Dominico Herrera.
Djarason 3 di yüni 2015, alrededor di 03.25’or di mardugá Sentral di Polis a haña notifikashon ku na Poliklínika di Sehos un hòmber di 76 aña a yega einan pa tratamentu médiko pa leshonnan ku el a sufri durante di un atrako ku un ratu promé a tuma lugá na su kas den Kaya Dominico J.R. Herrrera na Bonam. For di un investigashon ku polis a realisá a resultá ku e pareha, di 76 i 66 aña di edat, na momentu ku nan a yega kas den nan outo a keda sorprendé den kurá di kas pa dos hòmber bistí na pretu ku a menasá nan i bringa ku e hòmber pa kita su pertinensianan for di dje. Durante di e forsageo nan a dal e hòmber un pushá ku konsekuensia ku e víktima a kai, kap su kabes. E sospechosonan e ora ei a kita su prendanan for di dje pa despues hui bai na pia for di e sitio. E víktima a keda transportá pa poliklínika den un outo partikular na unda el a risibí tratamentu médiko. E investigashon den e kaso aki ta kontinuá.
###
kontròl general i preventivo.
Djamars 2 yüni 2015, Personal di Warda di Polis Rio Canario (T.H.T.) a tene kontròlnan general i preventivo kuminsando for di 06’or di atardi riba F.D. Rooseveltweg, Winston Churchillweg i Bermudaweg. Durante di e kontròlnan aki a kontrolá un total di 27 vehíkulo i a parti 13 prosèsverbal na shofùrnan ku a kometé diferente infrakshon. Entre otro pa kore outo ku glasnan skur, sin faha di seguridat i sin reibeweis.
###
Detenshon pa Menasa, Destrukshon & Maltrato
Djadumingu 31 di mei 2015 alrededor di 17.00 ’or, un unidat Polisial a detené e hòmber H.B. nasé na Kòrsou, na un kas den Matanciatraat, en konekshon ku destrukshon i maltrato.
For di un investigashon preliminar a resultá ku e sospechoso a maltratá su èks i tambe el a kousa destrukshon na su vehíkulo.
Despues di a presentá e sospechoso dilanti di un fiskal ouksiliar, el a keda enkarselá pendiente di mas investigashon.
###
Tiroteo i sekuestro
Djamars 2 di yüni, Sentral di Polis a risibí notifikashon di un kaso di tiroteo ku a tuma lugá na Aeropuerto Hato. Mesora a dirigí algun unidat na e sitio i for di investigashon preliminar a bin sali na kla ku algun ratu promé un pareha a kaba di yega Kòrsou for di eksterior. Na momentu ku nan tabata bandoná aeropuerto den e vehíkulo di konosínan ku a bin buska nan, nan a wòrdu blòkiá pa un otro vehíkulo. E personanan den e vehíkulo ku a blòkiá e outo a lòs algun tiru i na e momentu ei e sospechosonan a drenta den e vehíkulo ku nan a blòkia i bai ku e dos damanan ku tabata den e outo. Dos hòmber ku tabata den e outo blòkiá, a logra baha i kore bai. Den área di Seru Fortuna, e duo sospechoso a laga e dos damanan atras i a move for di e sitio ku nan pertenensia. Mas lat polis a bin topa e vehíkulo ku un kantidat supstansial di sèn efektivo den dje. A konfiská e sèn i outo pa mas investigashon.
