Posiblemente atrakadornan (antiano) a drenta kas robes
Tilburg – Atrakadónan tabatin kabei rasta, djente di oro i usando un idioma paresido na papiamentu, motibu ku polis ta pensa ku atrakadónan ta antiano. Resientemente e programa di televishon Opsporing Verzocht a pidi atenshon pa un kaso serio di atrako i maltrato ku a tuma lugá den un kas na Tilburg. E hòmber di kas a keda seriamente heridá ku un “nekwervel” kibrá.
Tabata dia 20 di mei di e aña aki ora ku den kareda di 11.30 di mainta bèl ta zona na un kas di un pareha penshonado. Ta trata di un señora di 69 aña di edat i e hòmber tin 74 aña di edat.
E momentu ei e señora so tabata na kas, ora ku e bèl a zona. E ta wak pafó e no ta mira niun hende, pero pa siguransa e ta habri e porta pa e wak un biaha mas i den un forma sorprendente e dos hende hòmber agresivo ta menas’é ku un pistol i manda paden.
Akinan nan a kuminsá pidi pa plaka. Diripiente e porta di kas ta habri i e hòmber di kas ta kana drenta i akinan sin duna niun klase di espasio a maltratá e hòmber di tal forma ku el a pèrdè konosementu. E dos hòmber agresivo nan aki a sali kas i kore limpi bai.
E víktima a keda ku un “nekwervel” kibrá, tambe e wesu ku nan ta yama “we’ifunchi”i nanishi kibrá. Segun médikonan, pa kibra un hende su “nekwervel” mester tabatin hopi violensia. E víktima a drumi algun dia den hospital pa e rekuperá, pa despues sigui kura na kas.
Kiko tabata e motibu ku e dos atrakadónan a skohe e kas enkuestion pa drenta aden no ta konosí, pa motibu ku den e kas aki no tin nèt nèt nada partikular.
Polis ta kere ku e chèns ta grandi ku e dos tiponan aki a drenta kas robes i nan lo a ripara ku no ta e hendenan ku nan tin mester i a kore bai.
Tur e dos hòmbernan tin aspekto antiano. Un di nan tin kabei rasta lorá den un mea i nan edat ta varia den 30 aña. Un otro aspekto mas ku ta pone e víktimanan pensa ku ta antiano ta djente di oro i tambe nan ta papia papiamentu i ulandes ku un aksènt antiano.
Mester indiká ku entre tantu e ulandes por distinguí e antiano hopi bon for di e otro rasanan, manera surinameño i marokano etcetera.
Hendenan di den bario tambe a duna di konosé ku riba e dia enkuestion, nan a tuma nota di dos hòmber aspekto antiano tabata kana den e kaya enkuestion i a tende nan papia papiamentu tambe i ta pensa ku ta nan ta e atrakadónan.
P’esei polis di Tilburg ta pidi ken ku sa algu di e suseso aki pa notifiká polis pa solushoná e kaso aki.
###
Hóben i kriminalidat algu ku mester traha duru riba dje
Willemstad – Hóben i kriminalidat, algu ku mester traha riba dje, Den e siman aki tabatin un reunion interesante entre di “Commissie Jeugd Criminaliteit” i Gabinete di Prokurador-General, pa “brainstorm” riba kon pa tene hóbennan for di kriminalidat. For di e relato anual di Ministerio Públiko por a tuma nieta tambe kon di nan parti e atenshon riba e partikularidat aki ta haltu riba nan lista di akshon.
Un di e proyektonan ku sin mas a kuminsá promé di desèmber di aña pasá i ku e prensa ku e sifra di hóbennan ku ta kai den kriminalidat ta baha ta e proyekto ‘Tur Wowo Riba Bo’.
E proyekto aki ta dirigí riba e hóben ku ta kometé krímennan pisá, manera atrako, ladronisia den kas di hende, violensianan pisá, manera tiroteo etcetera. E proyekto aki a drenta na vigor ku sosten di Munisipio di Amsterdam ku pa algun anan kaba nan tin e tipo di proyekto aki i ku bon resultado. Nan ta yama esaki e “Top C” o sea “high impact criminalitiet”.
Esnan ku ta den e “high impact criminalitiet” aki, mester sinti ku algu ta pasando ku nan i pa nan no ripití i esnan ku tin e tendensia di drenta e área aki no hinka nan kurpa aden.
Un di e aspektonan ku sin mas mester traha ariba ta pa trese e hóbennan aki mas lihé posibel na huisio pa sinti ku e loke ku nan a hasi tin su konsekuensia.
Pero si solamente focus riba represhon no ta efektivo, pero mester di e trato despues ku un hóben kai den gara di hustisia, pa motibu ku mayoria biaha e grupo ku ta kai den kriminalidat, nan aspektonan sosial emoshonal mester di hopi atenshon.
Hopi biaha e kombinashon di adikshon ta hunga un riol,, pobresa, drop outs. E grupo aki no solamente mester keda kastigu ku prizon, pero mester di hopi guia despues trayektonan di trabou p’asina saka e hóben for di e área aki.
Mester buska un solushon pa e grupo aki, kaminda ku e generashon mas hóben ku ta e rumannan muhé i hòmber no mester sigui e ehèmpel di nan ruman mas grandi.
E proyekto aki ta kana te fin di 2015 i e ora ei e resultadonan lo bira konosí. Banda di esei ketu bai tin enkuentronan tumbando lugá pa duna un man den e afan aki.
Konforme sifranan ku e relato anual tin di e grupo di hóbennan ku ta kai den krímen ta indiká ku den 2014 tabatin 6 mucha ku nan edat entre di 12 – 15 aña a kai será, 40 hóben ku nan edat ta entre 16 – 17 a kai den gara di hustisia, 119 hóben ku nan edat ta entre 18 – 20 aña.
###
Bara nan di oro supuestamente derá
Willemstad – Hustisia buskando baranan di oro ku a keda hòrtá durante atrako ku a tuma lugá na zona liber, kaminda ku un personal di seguridat a pèrdè su bida.
Miéntras ku ketu bai arestonan ta keda realisá den e investigashon kaminda ku morto a kai durante atrako i kasonan den korte pro-forma ta pendiente pa tuma lugá e siman aki, hustisia a forma un tim multi disiplinario p’asina buska na unda e baranan di oro ku a keda hòrtá ta.
Ayera den oranan di mainta, bou di guia di fiskal di Ministerio Públiko, huntu ku personal di Atrako Tim, “Landmacht” (militar) i tambe polisnan di Ploeg 5 a tene entrada hudisial na un kas na Kaya Shilling relashoná ku e kaso di Atrako ku Morto ku a tuma lugá na Zona Liber na Hato, dia 6 di mart último.
Den kuadro di e investigashon, polisnan di Atrako Tim i tambe Fiskal tabatin posibel informashon ku na e kas no habitá ku nan a bai, lo por tin e bara nan di oro skondí òf tambe otro artíkulonan ku a keda kitá durante di e atrako aki.
Den kuadro di esei a pidi ekspertonan di Marina pa bini ku nan ekiponan spesial pa detektá metal i a hasi vários investigashon unda a listra i koba na e kas aki.
Sinembargo no a logra di konfiská nada i Atrako Tim ta kontinuá ku e investigashon den e kaso aki.
Riba e dia di atrako e personal di seguridat di e kompania Panamericano, Zhadiro Zevenhuizen a pèrdè su bida.
Mester indiká ku e investigashon ta riba e bon kaminda, sigur si tuma na konsiderashon ku ya tin 5 aresto pa loke ta trata e atrako brutal aki.
###
Ainda hopi abusu tumando lugá den sektor laboral
Willemstad – Ainda tin hopi abusu tumando lugá den sektor laboral, esaki por keda dedusí for di un kaso ku abogado mr. Diahanne Lichtenberg (foto) spesialisá den lei laboral, ta bezig kuné den korte.
Resientemente un trahadó ehemplar ta haña retiro ora ku el a persistí riba su fakansi. E trahadó aki tin 5 aña sin bai ku vakashon i ora el a tuma esaki, tabata alabes su último dia di trabou.
Aktualmente tin un disputa den korte di un trahadó kontra di su doño di trabou, pa retiro sin motibu. Despues di sinku aña trahando sin tuma un dia di fakansi, ora ku e trahadó ku a pidi su fakansi a tuma esaki, a tende ku a kit’é for di trabou.
Ta trata di un trahadó ku tabata traha pa su doño di trabou na su kas, tene su kurá limpi i tabata un bon “handyman”. Semper e tabata bon mirá serka e doño i nunka tabatin un reklamo riba su trabounan ni tampoko su komportashon. Un persona ku ta respetá su doño di trabou.
Miéntras e tabata hasi e trabounan na kas di e doño di trabou, el a haña dos otro trabou, pero el a nenga pa motibu ku e doño di trabou a dun’é un kos di hasi na su negoshi.
E echo ku e doño konosé e trahadó pa algun tempu kaba i tabata sa su kalidat di hende ku e ta, no tabata nesesario pa sera un kontrato, pero tur kos a bai verbal. Aki el a bira e hòmber di tur kos. Kualke problema ku tin e ta solushoná.
E tabata haña un suma di 2300 florin pa luna, ounke ku e doño a primintié 2500 florin pa luna, pero e no a hasi problema ku esaki. Despues el a komprondé ku e sèn ku a keda kitá for di dje ta di un kasita ku e doño a dun’é pa e biba aden i alabes wak su lugá pe.
Entre tantu 5 aña a pasa ku nunka e trahadó a tuma ni un dia di fakansi. E aspekto inhustu ta sintá na e echo ku e tahadó a regla sinku dia di fakansi basta luna adelantá i asta tabatin palabrashon ku su doño di trabou ku esei lo ta e kaso.
Dia ku e trahadó a tuma su dianan di fakansi e doño di trabou a splik’é, ku e ta haña sinku dia di fakansi, pero esei ta nifiká na mes momentu su último dia di trabou.
Pues sin duna e trahadó aki niun motibu bálido, sin niun reklamo, e trahadó ta pèrdè trabou di e forma aki.
Esaki ta e disputa ku ta andando den korte i abogado mr Diahanne Lichtenberg tin e interesnan di e tahadó na su enkargo. Abogado Lichtenberg ta spesialisá den lei di labor i esaki ta reflehá tambe den su nota di defensa.
Resientemente e abogado a trese su nota di defensa bon motivá dilanti den sala di korte, poniendo énfasis riba vários aspektonan di lei i tur e puntonan kaminda ku e doño di trabou a faya kuné i ku e doño di trabou tin di asumí su responsabilidat.
E petishon ta simpel no tin motibu di retiro i e trabou tin di kontinuá normal. Denter korto tin veredikto.
###
Fuente: hustisia.com
