Pa Korant Vigilante
Willemstad, Curacao — Entre febrüari 2013 pa aprel 2013, defuntu Helmin Wiels, apesar di a risibí diferente atvertensha pa no sigui bai, a hiba kòmbersashon ku eks hefe di tim (Team Chef) di RST na Kòrsou. Ta trata di e hòmber Wim K.. E promé kòmbersashon a tuma lugá den studio na Caracasbaaiweg, i diferente testigu den seno di Pueblo Soberano a mira Wim K. den kòmbersashon ku Helmin Wiels. Entre nan Kade Wilsoe, kende a puntra Wiels kiko tabata pasando i Wiels a konfirmá na Kade ku Wim K., tabata kier un “fabor”.
Pero Wiels, sin a bai ku su bòdigard personal, Josepsha, a topa dos biaha mas ku Wim K. Ruman di Helmin Wiels, Werner Wiels, ta konfirmá ku e tambe a atvertí Helmin pa no sigui bai, ya ku Werner su amigunan den kuerpo di polis a splik’e ku e kòmbersashonnan por resultá peligroso, pasobra RST no tabata kos di konfia. E kòmbersashonnan di Wiels i Wim K, tabata den kuadro pa e eks hefe di RST, despues ku su periodo finalisá na mei 2013, e logra haña un puesto komo konsehero den kuerpo di polis. Minister Navarro, despues di e asesinato di Helmin Wiels na mei 2013, en bèrdat a tuma Wim K., komo konsehero den kuerpo di polis. K. a keda un aña komo konsehero di korps i na 2014, el a bandoná e isla.
Te awe ni fiskal Rip, ni RST mes no por a logra haña sa kontenido berdadero di kòmbersashonnnan di Helmin Wiels i Wim K. No tin un proses ferbal di tur e kòmbersashonnan tampoko. De fakto, RST a sali nenga ku Wim K. a papia ku Wiels i despues a atmití ku nan a papia “un biaha so”. Pero dikon un hòmber manera Wiels, kende na promé lugá NO tabata gusta RST mes i na di dos lugá no tabata kier a mira NIUN makamba komo konsehero, a papia ku Wim K. tòg?
Un fuente a revelá na Vigilante ku “nos mester a regla tres kòmbersashon entre nan kual esun promé a tuma lugá den e studio na Caracasbaaiweg”. Dikon Wiels lo a hiba un makamba sinta ku’ne den studio, sin a bisa niun hende di Pueblo Soberano. Tin indikashon no konfirmá ku e promé kombersashon ta grabá (den studio) i ku nan a papia riba diferente sektor den e kadena hudisial.
Pero miéntras Wiels tabata papiando ku Wim K., un grupo di hòmber, kende fiskal mr Rip a bisa den tratamentu di nan kaso, a “shòk” Kòrsou ku diferente krímen, tabata vigilando Wiels su kòmbersashonnan ku Wim K..Tabata trata di mesun grupo di hende kendenan a ehekuta robo den bara di oro i idiferente atrako di oloshi. RST, mes a lèk e informashon na e grupo di hòmbernan, kende por sierto tabatin relashon ku partidonan polítiko na Kòrsou.
(Riba e foto por mira Wim K. durante e rueda di prensa riba morto di Wiels na mei 2013)
NOTA di Vigilante riba su pagina di facebook…
Vigilante ta hopi agredisido pa e mas di 30 mil komentario i reakshonnan riba publikashon di Helmin Wiels.. Anke nos ta suplika pa apstene e palabranan insolente, nos ta sostene libertat di ekspreshon. Awe, mas lat nos tei publika un di tres artikulo, unda nos lo sigui informa pueblo riba e relashon entre oloshinan horta i asesinato di Helmin Wiels. Nos ke suplika hopi pasenshi, pasobra pa por kompronde e asesinato aki ku tin nos pueblo ainda konfundi, mester bai bek unda el a inisia i dikon el a yega asina leu. Entre otro awe, lo publika e proseso kon kolombianonan a konfiska e boto di motor di defuntu Luigi Florentina kual a kondusi despues na asesinato horendo di unu di nan. Nos lo publika mas lat e nomber di e kolombiano i tambe refleha dikon MInisterio Publiko a yega lat na e pida prueba aki. Nos ta bolbe suplika un poko pasenshi i mester keda mira e hechosnan. E motibu dikon nos ta kuminsa publika ta un esfuerso pa kisas motiva Ministerio Publiko asumi un posishon den e kaso Maximus. Sea ta sera e kaso of sera esnan kende a “sostene” e proseso pa asesina e lider apsoluto di Pueblo Soberano
