WILLEMSTAD, Curacao –Te ku awe mainta ainda parlamentario Michelangelo Martinez ta detene relashona ku un insidente ku a tuma luga awe marduga na Mahuma kua a pone ku tur unidat polisial a yega na e sitio. Manera ta konosi pa algun siman kuerpo polisial a anunsia ku lo aplika 0-Toleransia den kuadro dje medidanan di covid 19.
Awe marduga (Feb 13, 2022) nan a bai na un sitio ku tabatin aglomerashon di hende despues di ora di Toke de Keda . Na momentu ku polisnan a akudi nan a enkontra resistensia di Parlamentario Michelangelo Martinez kende a indika na nan ku e ta nan hefe.
E resistensia tabata di tal grado ku hasta tabatin forsegeo. E polisnan kier a detene al instante, pero a sinti nan mes intimida pa esnan presente.
Un yamada a ser hasi i otro polisnan ku a akudi a yega i papia kune trahando e afspraak ku e ta meldu na warda. E fiskal ouksiliar M. i otro koleganan a keda papia ku e parlamentario mas ku 1 ora kua a indigna diferente polis ei bou, paso nan ta di opinion ku ta mesora mester a detene pa loke a tuma luga sin muchu papiamentu.
Segun informashonnan risibi ta asina ku e parlamentario ta ainda detene, mientras ku e polis di fam P. ku a risibi sla a keda di bai CMC pa hasi un keho entre tantu. Ta bon pa remarka ku tin periodistanan polisial konosi ku tabata presente i tin videonan di loke a tuma luga, pero ku e biaha aki si di forma remarkabel no a drenta ku e info komo “Breaking News”.
E suseso di awe marduga a kousa basta indignashon bou di miembronan di kuerpo polisial, paso pa nan ta inaseptabel tal komportashon kontra di nan.
Fuente: FB Julius Koko
