Djaluna 27 di yanüari 2025, tabata ofisialmente komienso di e estudio pa bira polis di 2 aña pa 11 agente aspirante di Kuerpo Polisial Hulanda Karibense(KPCN) i 7 agente aspirante di Kuerpo Polisial Sint Maarten(KPSM). Durante un seremonia na warda di polis na Philipsburg, e minister di hustisia di Sint Maarten, Mr. Nathalie Tackling, e kordinadó di akademia di polis den e área di Karibe, sr. Jan-Willem Ruts, hefe di KPCN, sr. Alwyn Braaf i e hefe di KPSM, sr. Carl John, a hiba palabra.
E oradónan durante nan diskurso a enfatisá e importansia di e profeshon ku e aspirantenan a skohe p’e i a rekordá e aspirantenan ku e profeshon di polis ta ankrá den duna servisio na komunidat. Nan a enfatisá integridat komo un balor fundamental ku mester mantené den nan ròl den futuro. A enkurashá e aspirantenan pa keda firme den nan kompromiso pa protehá i sirbi ku honor i dedikashon.
Na e seremonia tambe tabata presente e tim di maneho di KPSM, hefe di e departamentu operashonal di KPCN, sr. Clark Mercera, kordinadó di estudio pa KPCN, sr. Rouel Pinedo i e dosentenan i guiadónan di práktika ku lo guia i sostené e studiantenan durante e estudio na Sint Maarten.
Durante e próksimo dos aña, e aspirantenan nobo lo sigui un estudio intensivo bou di responsablidat di Akademia di Polis di Hulanda, di kua nan lo sera konosi ku diferente aspekto di e trabou di polis, manera supervishon, investigashon di delito i kon pa brinda yudansa den kaso di emergensia. E 11 aspirantenan nobo pa Hulanda Karibense lo sigui e parti teorétiko di e estudio na Sint Maarten i e eksperensia práktiko na Boneiru. Na final di e estudio, e aspirantenan aki lo tin un diploma di polis riba nivel MBO-4, despues di kua por desplegá nan kompletamente riba Boneiru, Sint Eustatius i Saba.
Kuerpo Polisial Hulanda Karibense ta deseá e aspirantenan pa polis tur klase di éksito ku e estudio.