Kralendijk – Riba djárason 29 di yanüari klientenan di FKPD (Fundashon Kuido pa Personanan Desabilitá) a eksperensiá un dia spesial na Isidel Beach Park na Boneiru. Nan a hasi uso di e rampa ku resientemente a keda konstruí pa hende ku limitashon físiko, ku ta hasi posibel pa nan tin akseso fásil na laman. E rampa, ku ta dediká na sr. Edmundo (Eddy) Christiaan, for di luna di desèmber aña pasá ta forma parti di e parke i ta disponibel pa tur hende i e ta hasi posibel pa tur habitante di Boneiru gosa di laman, no opstante kualke limitashon físiko.
A yama e bishitantenan bon biní ku algu di bebe i nan por a hasi uso henter dia di e fasilidatnan di Isidel Beach Park. Nan a sera konosí ku señor Christiaan ku for di aña 1974 te aña 2000 a duna lès di landamentu na e sitio akí. Entretantu e ruina di e waf kaminda e tabata duna lès a transformá den un di e sitionan di mas bunita di Boneiru pa snòrkel i sambuyá. Awor akí e parke ta brinda un ambiente trankil i aksesibel pa tantu habitantenan lokal komo turistanan. Edilse Goeloe, direktor di FKPD, ta kontentu ku e desaroyo akí: “E fasilidat nobo akí ta un mehorashon importante pa aksesibilidat na Boneiru i e ta ofresé un oportunidat pa tur hende por disfrutá di e bunita laman i bich. Ta tremendo pa mira ku kada biaha nos komunidat ta haña mas posibilidat pa partisipá na aktividatnan rekreativo, no opstante nan limitashon físiko.”
Engrandesé inklusividat na Boneiru
E prome rampa nobo aki ta un paso importante den engrandesimentu di inklusividat na Boneiru i e ta brinda un manera seif i fásil pa hende ku limitashon di mobilidat gosa di Isidel Beach Park i di nos naturalesa. Adely Susana-Jansen, direktor di BOG i alabes di Isidel Beach Park, ta orguyoso ku ampliashon di su fasilidatnan i e ta spera ku e inisiativa akí ta inspirá otronan pa sigui promové inklusividat na nos isla. “E rampa pa aksesibilidat for di awor ta un parti permanente di e parke, i tur hende ta kordialmente bon biní pa hasi uso di esaki!” Den e ‘gym’ na aire liber tin aparato pa hasi ehersisio tambe pa hende ku ta den ròlstul i den e parti di hunga riba petishon a pone un skòmel pa hende ku limitashon.
Mas informashon i reservashon
Pa mas informashon tokante Isidel Beach Park i e medidanan di aksesibilidat, i tambe tokante reservashon di e ròlstul pa den laman i e skòmel pa hende ku limitashon, bo por tuma kontakto ku e manehadónan di Isidel Beach Park via email: [email protected] òf via telefòn/whatsapp +599 777 4262.
