Kòntròlnan general i preventivo.
Djabièrnè 10 di aprel 2015 den oranan di anochi, e tim di mantenshon di òrdu públiko di Rio Canario a tene kòntròl preventivo riba Schottegatweg West na altura di Post 4. E kòntròl tabata dirigí riba e.o. infrakshon di lei di opio i posishon ilegal di arma (di kandela). Despues e tim aki a tene e mesun kòntròl aki tambe riba Emancipatie Boulevard. A kontrolá mas ku 200 vehíkulo, mientras ku a detené dos persona pa insulto di polis. E kòntròlnan aki ta kontinuá.
####
Detenshon.
Djabièrnè 10 di aprel 2015 alrededor di 12’or di mardugá, Sentral di Polis a dirigí un unidat di Montaña pa Sta. Catharinaweg , pa tres tipo ku lo mester tabata hortando den un kas. Na yegada di e patruya, nan a topa un hòmber ku tabata bulando muraya di un kurá di un kas. Polis a kuminsá inmediatamente ku un persekushon na pia tras di e tipo aki, kende na su turno a los un tiru dirigí riba e polisnan. E unidat a kontesta e tiru aki mesora bèk ku algun tiru dirigí, ku a alkansá e sospechoso G.D. di 16 aña nasé na Kòrsou, na e parti patras di su pia robes. Na e sitio e sospechoso a keda detené i a wòrdu hibá poli ku ambulans, unda el a keda interná. A presentá e sospechoso dilanti di un fiskal ouksiliar, mientras investigashon den e kaso aki ta kontinuá.
####
Detenshon en konekshon ku ‘skimming’.
Djabièrnè 10 di aprel 2015, alrededor di 11.00’or di mainta un unidat polisial a detené na un banko na Colon e dama L.L.B., nasé na Hulanda di 20 aña di edat, ku a hasi su mes kulpabel na entre otro inkubrimentu. E dama aki riba instrukshon di un nigeriano ku el a konosé via di Internèt, kontra pago lo mester a lanta un suma di plaka for di un kuenta na e banko lokal i via di un kompania ku ta transferí plaka a manda e suma di plaka aki pa e nigeriano. For di investigashon a bin resultá ku nigerianonan lo mester a ‘hack’ un suma di plaka konsiderabel for di un kompania di seguro lokal. No ta ekskluí e posibilidat ku lo bai tin mas detenshon den e kaso aki. E sospechoso B. a keda enkarselá pendiente di mas investigashon.
####
Detenshon pa plaka falsu.
Djabièrnè 10 di aprel 2015 Politur den oranan di mèrdia a bai na un hotèl situá na John F. Kennedy Boulevard na unda un turista venesolano a bai trata di paga ku dòler falsu. Polis a konfiská un total di 9 papel di 100 dòler ku e sospechoso tabatin den su poder. A detené e hòmber, L.E.A.M., nasé na Venezuela di 29 aña di edat a present’é dilanti di un fiskal ouksiliar ku a ordená su enkarselamentu pa mas investigashon.
