CURACAO (KPC)– Djaluna 6 di yanüari 2025 Kuerpo Polisial Kòrsou a yama bon bini na 16 agente aspirante. Despues ku den oranan di mainta nan a keda risibí pa Minister di Hustisia mr. Shalten Hato na su despacho, el a pasa nan simbólikamente over pa hefe di Kuerpo Polisial sr. Raymond Ellis.
E grupo di agentenan aspirante aki, despues a keda transportá den vehíkulonan polisial den un karavana pa kompleho polisial na Winston Churchillweg.
Einan den presensia di nan mayornan, tantu minister, hefe di kuerpo komo direktor di Instituto di Formashon pa Mantenshon di Lei i Seguridat , señora Alpha Falbru a dirigí palabra na esnan presente.
Despues Sentral di Polis a manda un mensahe general via di radio di polis, yamando e grupo di koleganan aki bon bini, éksito ku nan estudio, ku e speransa di mira nan pronto bèk pa fortifiká e organisashon.
Seguidamente a invitá tantu e hóbennan, nan mayornan i demas hefenan i koleganan pa kantina di e instituto di formashon, na unda simbólikamente e aspirantenan a ser entregá na e instituto di formashon.
Aki nan lo bai kontinuá e próksimo 2 añanan ku nan estudio básiko pa por ehersé e funshon di ‘Medewerker Noodhulp/Handhaving’.
