Detenshon pa maltrato i intento di asesinato.
WILLEMSTAD, Curacao — Djabièrnè 26 di yüni 2015, alrededor di 6’or di atardi, Polis a detené dos hòmber i un dama na St.Joris relashoná ku maltrato i intento di asesinato. For di un investigashon preliminar ku polis a realisá, a resultá ku e sospechosonan tabatin un problema relashoná ku asuntu di hürmentu di kas.
E problema a yega asina leu ku e hòmber sospechoso O.B. di 26 aña di edat a dal e otro hòmber sospechoso E.J.P. di 64 aña di edat ku outo. Na momentu ku kasa di e hòmber E.J.P. a mira loke ta pasando, e dama Y.E.M.P. di 44 aña di edat huntu ku su kasa a kuminsá dal O.B. ku piedra. O.B. a risibí kap na kabes i kachete.
Ambulans a presentá na e sitio i a trata E.J.P. na e sitio mes i a transportá O.B. pa poliklínika di SEHOS pa tratamentu médiko. Polis a detené e tres sospechosonan i a presentá nan dilanti di un fiskal ouksiliar ku a ordená nan enkarselamentu pendiente di mas investigashon.
###
Detenshon pa maltrato.
WILLEMSTAD, Curacao — Djabièrnè 26 di yüni 2015, alrededor di 07.’or di anochi, Polis a detené na Weis afó e hòmber W.C.J. di 50 aña di edat, nasé na Kòrsou, pa un kaso di maltrato.
For di un investigashon preliminar ku polis a realisá, a resultá ku e sospechoso a topa ku e víktima na Weis afó i a maltrat’é ku piedra i bòter debí na un problema bieu ku nan tabatin ku otro.
E víktima a haña un kap na su kabes, despues di a haña tratamentu médiko na poliklínika di SEHOS e por a bai kas.
E sospechoso J. a keda presentá dilanti di un fiskal ouksiliar i el a keda será pendiente di mas investigashon.
###
Detenshon pa violensha relashonal.
WILLEMSTAD, Curacao — Djabièrnè 26 di yüni 2015, alrededor di 17.10’, polis a detené den área di Sta. Elena, e hòmber F.L. di 52 aña di edat, nasé na Haiti en konekshon ku maltrato di su pareha i un yu menor di edat.
A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
###
Tópiko: Dama pèrdí na laman.
Djaweps 25 di yüni 2015, alrededor di 17.10’or, Sentral di Polis a dirigí un patruya polisial na playa Kas Abou pa un persona ku ta pèrdí.
For di un investigashon preliminar ku polis a hasi na e sitio a resultá ku un grupo di turista a bai sambuyá i snòrkel.
Na momentu ku e grupo a bini bek na kantu, nan nota ku un dama no a bini bek ariba.
Mesora a pone Warda Kosta i Citro na altura i a kuminsá ku búskeda di e dama turista di 28 aña di edat ku ta pèrdí. Búskeda a dura te den oranan di anochi sin e resultado deseá.
Awe 26 di yüni a sigui ku búskeda di e dama.
