WILLEMSTAD, Curacao — “Sentro di Instrukshon pa Hende Sabi” ta siña ku ta solamente un kos tin ku ta stroba un hende di sobresalí kualkier problema i di logra su metanan i esaki ta su nivel di konsiensia. Awor ta posibel pa ken ku ke sobresalí kualkier opstákulo i logra metanan grandi na un manera aselerá ku e workshopnan strukturá i counseling / coaching priva ofresé via e skol nobo yamá “Triumphant Warrior Academy.” Patricia Varlack, direktora di “Sentro di Instrukshon pa Hende Sabi,” ta informá ku e konsientisashon, konosementu, i sabiduria ku e studiantenan di e skol lo haña for di workshopnan i seshonan privá, lo pone nan na un gran bentaha.
Patricia ta splika ku no tin nodi di desesperá, frustra i entregá, simplemente un persona tin di bira konsiente di kon pa trata, ki métodonan simpel i garantisá pa apliká pa atraé i garantisá éksito den kada área di bida. E workshopnan ta alkaso i ta keda build up un riba e otro. Segun Patricia, bo por haña tur lokual bo kier den kada área di bida. E workshopnan ofresé den e skol nobo lo ta hopi interesante i lo duna hopi material klave ku un persona por kuminsá apliká mesora pa su éksito. E skol ku dura un aña si sigui e trayekto normal i ménos si tuma e workshopnan aselerá.
Ademas di ta direktora di Sentro di Instrukshon pa Hende Sabi, Patricia ta funshoná tambe komo motivational speaker, trainer, Master Mind group facilitator i coach i a publiká pa korant diferente artíkulonan tokante vários temanan i tambe a publiká 8 buki inkluyendo “How to Gain Spiritual Muscles”, “How to Cook and Eat your Boss”, “7 Things to Be in order to Achieve your Goals” i “The Different Faces of a Dysfunctional Family.” Banda di esaki Patricia ta presidente di Fundashon Obranan Grandi, ku ta un fundashon ku entre otro ta fasilitá training pa hendenan ku ta aspirá pa ta eskritor.
E promé set di workshopnan tokante e mente ta i lo tuma lugá respektivamente dia:
28 di yüli – Kon pa usa bo Poder pa Triunfá. – Lo bo siña kon poderoso bo ta dor di siña:
*komprondé kon bo mente ta traha;
*kiko ta mantenébo den un sirkulo visioso negativo;
*identifiká eksaktamente kua pensamentunan ta blòkia bo éksito sea finansiero, salú, relashon, i mas;
*un fórmula kon eliminá kiko ta blòkia bo éksito.
4 di ougùstùs – Kuminsá ku e Final na Mente. – Lo bo siña:
* kon pa skohe metanan ku ta kuadra spesífikamente pa bo;
* ki metanan pa evitá;
* e manera mas efektivo pa logra bo metanan.
11 di ougùstùs – Kon pa usa Strategianan di Mente pa Konkista. – Lo bo siña
* kon bo mente ta funshoná;
* ki tur e aspektonan di bo mente ta;
* i kon pa efektivamente usa bo mente pa logra metanan grandi.
Empresanan ta wòrdu enkurashá pa manda nan trahadónan pa partisipá i asina haña tambe benefisio di e material riku na sabiduria. Kada workshop ta kosta Nafl.80 ku ta inkluí OB i un handout. Preis redusí di Nafl. 65 pa kada workshop ta optenibel si paga pa tur tres workshop den un tiru. Personanan interesá pa partisipá ta rekomendá pa depositá pago kompañá ku bo nòmber riba kuenta MCB #275.255-07 .
E promé workshop ku ta tuma lugá dia 28 di yüli, 2015 lo ta na Sentro di Bario Janwe di 7or te 9or di anochi. Pa mas informashon, por fabor tuma kontakto ku Patricia Varlack na tel.522-1086.
