Tiramentu na Ser’i Dòmi.
WILLEMSTAD, Curacao — Djaluna 20 di yüli 2015, alrededor di 3.00’or di mardugá a drenta un informashon na Sentral di Polis ku deskonosínan a pasa tira riba un kas na Kaya Bazjan Karpata na Ser’i Domi.
For di un investigashon ku polis a realisá na e sitio a resultá ku deskonosínan den un outo blanku a pasa manda un klenku ku un karta mará na dje dor di bentana di e kas pa despues lòs algun tiru.
Polis a konstatá ku tabatin perforashon di bala den un bentana di e kas i haña un hùls bentá abou. A konfiská e artíkulonan e investigashon ta kontinuá.
###
Tiramentu na Caracasbaaiweg.
WILLEMSTAD, Curacao — Djaluna 20 di yüli 2015, alrededor di 02.00’or di mardugá Sentral di Polis a dirigí un patruya na un resòrt na Caracasbaaiweg na unda deskonosínan a pasa tira riba un apartamentu.
For di un investigashon preliminar ku polis a realisá na e sitio a resultá ku e hòmber habitante di e apartamento tabata sintá den sala di e kas ora ku diripiente el a tende zonido di bala.
Un di e bala nan a perforá e porta di glas i dos otro a dal den muraya di e kas pafó i den e buibor di e dak. Polis a haña un proyektil bentá abou den e kas i a konfiská esaki pa mas investigashon.
###
Identidat di e kurpa sin bida hañá na Landfill Malpais.
WILLEMSTAD, Curacao — Identidat di e kurpa sin bida hañá na Landfill Malpais djasabra 18 di yüli 2015 ( komunikado no. 349/2015) ta konosí.
Ta trata aki di e hòmber:
Murvin Eftafio Francisco Brunken, nasé na Kòrsou, 20 di sèptèmber 1960;
###
Kontròlnan general i preventivo.
WILLEMSTAD, Curacao — Djadumingu 19 di yüli 2015 den oranan di anochi e Tim di mantenshon di òrdu Públiko di Rio Canario a realisá diferente kontròl den áreanan di Punda i Rio Canario.
Den Roermondstraat bandi di muraya di un kas polis a topa ku un kantidat di 17 palu di mariwana.
En konekshon ku esaki a tene un entrada hudisial na e kas i den kurá di e kas polis a bin haña den un ket un kantidat di 62 palu di mariwana.
A konfiská tur e matanan i a detené dos hòmber, habitante di e kas, pa violashon di Lei di Opio:
G.D.C., nasé na Aruba, di 40 aña di edat
S.A.C., nasé na Kòrsou, di 21 aña di edat.
Den área di Skalo a kontrolá vários persona estranhero riba violashon di Lei di Atmishon i Ekspulshon.
Den Bargestraat dos homber di nashonalidat Venesolano ku no tabatin nan dokumentonan válido pa permanesé riba nos isla a keda detené pendiente nan deportashon. A kontrolá diferente snèk den área di Skalo i Sint Jago, di kual dos snèk den Sint Jago a keda será ku no tabata kumpli ku tur pèrmitnan nesesario.
A kontrolá tambe diferente persona agrupá den e área di Nieuw Nederland, Heelsumstraat, Monte Verde i Cher Asile riba violashon di Lei di arma i di droga.
E kontròlnan ta kontinuá.
###
Foto Strealuz
