Dr. Mariano ‘Pitòsh’ Heyden: Yu di Kòrsou ku beka pa investigashon sientífiko na Oustralia

1787
Dr. Mariano ‘Pitòsh’ Heyden

 

Willemstad – Gobièrnu di Oustralia a duna un beka balorá na 379 mil dòler (mas ku mei mion na florin) na e yu di Kòrsou Dr. Mariano ‘Pitòsh’ Heyden pa aselerá su investigashon sientífiko riba tereno di strategia, corporate governance i inovashon.

Ta trata aki di e prestigioso “Discovery Early Career Research Award” otorgá via di “Australian Research Council”, e órgano nashonal di mas haltu enkargá ku finansiamentu di investigashon sientífiko inovativo. E beka aki di gobièrnu oustraliano ta konsiderá e beka di mas prestigioso na Oustralia pa akadémikonan hóben.

Dr. Heyden ta Assistant Professor na Universidat di Newcastle na Oustralia i e ta promé i úniko persona di su fakultat ku a yega di sigurá e beka aki.

E beka ta pa un sientífiko ku tin su doktorado ménos ku 5 aña i ku basá riba su prestashon den e tempu kòrtiku aki ta keda konsiderá un di e tòp “prospektonan” internashonal den su área.

Pa medio di e tipo di invershonnan aki gobièrnu oustraliano ta purba stimulá inovashon nashonal i retené e tòp akadémikonan hóben.

Ménos ku 1% di akadémikonan na Oustralia ta risibí e beka aki anualmente.

Universidat di Newcastle (UON) a selebrá aña pasa nan di 50 aña di eksistensia.

UON ta konsider’é di ta un sientífiko tòp den tereno di strategia empresarial i na 2015 el a risibí e universidat su premio pa “Research & Innovation.”

Dr. Heyden tin vários publikashon sientífiko den e revistanan internashonal di mas prominente den business i management.

El a gradua na Universidat di Kòrsou na 2006 i despues a haña su títulonan di maestria i di dòktor na Universidat di Erasmus na Ulanda na 2012.